Geocelcio
Yr helfa drysor fyd-eang i’r teulu cyfan.
Ydych chi erioed wedi cael trafferth yn dwyn perswâd ar eich teulu i fynd am dro yng nghefn gwlad? Os felly, mae’n bosibl y bydd ‘Geocelcio’ yn ddelfrydol i chi!
Ar draws Parc Cenedlaethol Bannau Brycheiniog, mae tua 160 celc neu flwch trysor ynghudd – yn amrywio mewn maint o flychau ffilm bach i flychau plastig llawer mwy o faint a hen flychau bwledi – y cyfan yn aros i’w darganfod.
Mae geocelcio’n gallu bod yn debyg i gael eich tywysydd eich hun – yn eich arwain i fannau gwych ac esbonio beth sydd mor dda am leoliad, er enghraifft, safle lle tarodd awyren fomio o’r Ail Ryfel Byd â mynydd, stori drasig Tommy Jones, neu olygfa arbennig.
Y cyfan y mae ei angen arnoch yw uned GPS rydych chi’n ei dal â llaw, ynghyd â gwybodaeth o wefan geocaching i chi ddechrau ar eich helfa. Pan fyddwch wedi darganfod celc, gallwch rannu eich profiadau ar y we gyda phobl eraill sydd hefyd wedi cael eu bachu gan y gamp gyfffrous hon.
Serch hynny, peidiwch â meddwl bod rhaid i chi fuddsoddi mewn uned GPS cyn rhoi cynnig arni – gyda phrofiad o ddefnyddio map a chwmpawd, ynghyd â’r cliwiau ar wefan geocaching am leoliad y celc, mae’n ddigon posibl y gallwch ddod o hyd i rai o’r celciau haws!
Beth yw uned GPS sy’n cael ei dal â llaw?
Mae GPS (System Leoli Fyd-eang) sy’n cael ei dal â llaw, yn ddyfais electronig sy’n edrych yn debyg i ffôn symudol. Mae’n defnyddio lloerennau i gyfrif brasamcan o’ch lleoliad, ac fel arfer, bydd yn gywir o fewn rhyw 6-20 troedfedd.
Ar gyfer geocelcio, y cyfan y mae angen i chi ei wybod yw sut i gael mynediad i "bwynt ffordd" (waypoint) (cyfeirnod grid ar fap o’r DU) at guddfan y trysor (gweler isod). Bydd yr uned GPS yna’n eich arwain chi yno, a dyma pryd bydd yr helfa go iawn yn dechrau, oherwydd bydd angen i chi ddefnyddio’ch llygaid a’ch blaengaredd i ddod o hyd i’r celc cudd.
Beth yw darnau arian ‘Geocoins’?
Gall darnau arian arbennig, gyda’u codau adnabod unigryw ar gyfer actifadu ac olrhain, gael eu hanfon ar deithiau olrheiniadwy drwy gyfrwng y rhyngrwyd, o geocelc i geocelc, neu gael eu trosglwyddo ymhlith ffrindiau, gan gasglu straeon ar hyd y daith. Mae modd dilyn eu teithiau ar y we, drwy gofnodion sydd wedi cael eu rhoi ar wefan ‘geocaching’ gan y sawl sy’n eu darganfod. Gallwch lwytho ffotograffau i fyny hefyd, yn ogystal â sylwadau ynghylch y darnau arian. Beth am ddechrau eich casgliad unigryw eich hun gyda ‘Geocoin’ hyfryd Parc Cenedlaethol Bannau Brycheiniog?
Beth nesaf?
Mewngofnodwch a mynnwch gipolwg ar wefan geocaching i ddod o hyd i geocelciau ger eich cartref neu mewn ardal fel Bannau Brycheiniog, ardal rydych chi’n ystyried ymweld â hi yn y dyfodol.
Gwnewch gofnod o’r cyfesurynnau GPS (yn y Deyrnas Unedig, y peth hawsaf ei ddefnyddio yw’r cyfeirnod grid Prydeinig sy’n cael ei roi – mae hwn hefyd yn perthyn i fapiau OS) ac unrhyw gyfarwyddiadau penodol a fydd yn eich helpu i ddarganfod y geocelc.
Cofnodwch y cyfeirnod grid yn yr uned GPS gan ddefnyddio’r cyfarwyddiadau Sut i gofnodi.
Pan fyddwch chi wedi dod o hyd i leoliad y geocelc, rhowch y darn arian yn y celc a llofnodwch y llyfr log. Pan fyddwch chi’n cyrraedd adref, cofnodwch eich ymweliad ar wefan geocaching a mwynhewch ddilyn trywydd anturiaethau’r darn arian!
Moesau Geocelcio:
Nid oes llawer iawn o reolau ac maen nhw’n syml iawn:
- Gwnewch yn siwr nad oes neb arall yn eich gweld pan fyddwch chi’n dod o hyd i’r celc.
- Os ydych chi’n mynd â rhywbeth o’r celc, gadewch eitem o werth tebyg yn ei le (mae’n rhaid i eitemau fod yn ddiogel ac yn addas i blant).
- Llofnodwch y llyfr log.
- Mwynhewch eich hun!
- Cofnodwch eich darganfyddiad ar wefan geocaching pan fyddwch chi’n cyrraedd adref.
- Os ydych chi’n penderfynu sefydlu’ch geocelc eich hun, bydd angen caniatâd perchennog y tir arnoch. Yn y Parc Cenedlaethol, gallai hyn fod yn un o nifer o fudiadau neu berchenogion preifat – os nad ydych chi’n siwr pwy sy’n berchen ar y tir, rhowch alwad i ni: 01874 624437 neu anfonwch neges e-bost atom.
- Dilynwch y Cod Cefn Gwlad bob amser.
